29 janvier 2009
Strip occitan 4
22 janvier 2009
Ornitorinc, n'i a pro de l'engana - 2da partida : darrièr l'ornitorinc, lo comunautarisme
La primièra partida faguèt un brave rambalh dins la comunitat sientifica ! Ara sabem que lo famós "ornitorinc" non existís pas. La seconda partida l'esperavam pas de badas, la vaquí :
Darrièr l'ornitorinc, lo comunautarisme
Davant una engana tan evidenta, òm resta tot espantat que l'animal contunhe de figurar dins de revistas sientificas dichas seriosas, que faga vedeta dins de reportages que passan en prime-time a la telé e mai que s'encontre quitament dins los zoòs mai reputats. De segur qu'un eissorbament aital pòdia pas qu'escondre un manipòli machiavelic, una mistificacion d'una perversitat diabolica... Per o dire tot : un complòt de l'anti-França.
La prova la trapam dins una benda-dessenhada, que guinha los mainatges e que sembla a primièra vista inofensiva... Vòli parlar d'aquela òbra de propaganda ferotja :
Toto l'ornitorinc e l'arbre magic
Resumit : Toto es un brave gromand d'ornitorinc que viu al mitan d'una ribièira. Un matin, tanlèu desrevelhar, se maina que la ribièira es assecada. Quin desastre, el que li agradan tan los vèrms de vase ! Amb son amic Wawa lo coalà, decidan d'anar cap a l'amont per fins de cercar la causa de l'assecament. En tot caminar dins la forest prigonda, encontran un Wombà vielh que lor balha tres tròces d'escòrça magica.
Quand buta lo primièr troç d'escòrça dins lo sòl, Toto sòna l'esperit del passat, un fantasma que li revèla que la BÈSTIA a tampat la ribièira e tuat tots los animals a l'entorn. La segonda escòrça fa venir l'esperit del present, un aucèl paradisièr que fa aparéisser de noiridura pels amics e tanlèu aprèp s'avalis (es que lo present dura pas qu'un brieu). La tresena, esperit del futur e dels sòmis, mòstrarà al Toto lo camin cap a la ribièra.
En camin, Toto e Wawa an encontrat d'amics novels : Chichi l'equidne e Riri la ratapenada. Totes amassa, arriban a la ribièira e comprenan qu'es estada barrada per de brancas botadas de galís. Apparéis la BÈSTIA : un crocodile bèl. Tot s'acaba amb la lucha contra l'animal, lo qual s'avalís amb son barratge e la ribièira torna emplir sa maire.
Avèm doncas aici los ingredients de l'istòria :
- L'omosexualitat : Toto, Wawa, Chichi e Riri se passejan... M'avetz comprès. Se cal remembrar que l'ornitorinc es un mamifèr que pond d'uòus, valent a dire que pòt faire d'enfants sens èstre prens, pantais tipic de l'omoparentalitat.
- La toxicomania : solde que per veire de fantasmas o d'aucèls multicolòrs, l'aiga linda basta pas.
- L'incitacion a la revòlta contra la Republica : "la BÈSTIA", valent a dire... l'ESTAT, que fa pas que jogar son ròtle d'agençament del territòri.
- La fenhantisa : fenhantejar lo cuòl dins l'aiga, se conflar de vèrms de vase e penequejar lo demai de la jornada... Quin projècte ! Alara que lo barratge auriá balhat de travalh a tot lo monde.
- Lo passadisme : una ribièira, es plan polit mas s'òm vòl pas demorar tancat sus la riba del desvelopament, de pichòts sacrificis son necites.
Podem aital dire l'istòria vertadièra de Toto :
Toto es un fug-l'obra que tòca lo RMI. Amb sos complices que son ren que de destimborlats sexuals, refusan la construccion d'un barratge EDF e mai la procedura de consultacion publica siá estada plan respectada. Engimbran un passa-forest salvatge sens avisar la prefectura. En tot caminar, s'empegan amb totas sòrtas de drògas. Al cap del camin, francs (1) desvariats (cridan d'eslogans coma "gardarem la tèrra !" o "volèm viure al païs !"), se'n prenan a l'ESTAT en plasticar lo barratge. Bilanç : un mòrt.
Ara n'ia pro de tots los ornitorincs que pensan pas qu'a defendre lors pichòtas particularitats. L'interès general es sacrat, vaqui çò que cal ensenhar als mainatges ! Sulpic, cal tirar aquel Toto lo sabi-pas-que de las bibliotècas e li substituir quicòm mai sanitós, un exemple positiu per la juventut (e per començar, un animal conegut) :
- Toto lo conilh va a l'escòla de la Republica
- Toto lo conilh fa soldat
- Toto lo conilh trabalha a la centrala nucleara
- Toto lo conilh fa d'oras suplementarias per ganhar mai
- ...
Bon, aquel article lo vau prepausar a l'observatòri del comunautarisme, ça que la es pas ganhat...
E pels que vòlon legir una BD tarrible : Toto l'ornithorynque et l'arbre magique
Acampament d'ornitorincs
(1) Toto es de Valença
16 janvier 2009
Unifòrme
En me passejar sus las actualitats de Google, ai trapat aquela informacion de las importantas : lo ministre de l’educacion nacionala X. Darcos es per l’unifòrme a l’escòla, perque dis que « suprimis las diferéncias vesedoiras de nivèl social o de fortuna, e bota tots los escolans dins una situacion d’egalitat. »
Suprimir çò vesedor, vaqui plan l’ambicion de l’Estat sarkozian. Solide que l’escòla publica-laïca-obligatòria a pas gaire capitat (tanplan a pas vertadièrament ensajat) de suprimir quina diferéncia de riquesa que siá, e mai aguèsse plan capitat de suprimir de diferéncias qu’eran de riquesas.
L’idèia de l’unifòrme a l’escòla es pas tant nòva, lo Chevènement (1) l’avia ja aguda, me sembla. Sòlide qu’anèm pas badar a cada còp qu’una colha (2) de politician ensaja de faire lo sieu mestièr, valent a dire : desviar l’atencion de çò important. Pasmens, desirar que los mainatges carguen l’unifòrme es plan confòrme a la concepcion que se fan los elèits francèsas de las relacions entre l’Estat (de drech) e lo ciutadan (de dever ?). Aaa, França foguesse una casèrna bèla…
Alavetz, La Cabra e lo Lop a decidit de dobrir una seccion « mòda » per fins d’ajudar lo ministre, en li prepausar un vestit que tomba plan, benlèu un chic passat de mòda mas que faguèt sas provas :
- Tenguda del fantassin : quèpi rotge e blau ; capòta blava, cauças rojas, garramachas, sabatas de marcha.
- Accesòris : bòla de pan, cobèrta, biaça, bidon d’un litre, retrach del general Pétain (3), cartochièra, gamèla.
Una varianta de negligir pas (la camisòla es a tornar de mòda) :
(1) Castanhizable.
(2) Mèfi, m’anatz dire, que risqui de me faire perseguir per difamacion o sabi pas que. Òc que non ! Una difamacion es dins la lenga de Voltaire, dins la lenga de la mamèta aquò compta pas.
(3) Pas encara marescal a l’epòca.
15 janvier 2009
Strip occitan 3
08 janvier 2009
Strip occitan 2
Doas de mai...
05 janvier 2009
Strip occitan 1
