A Arcaishon, Francés Fontan es vengut querre l'independéncia d'Occitània. Finalament ça que la, las causas se debanèron pas completament coma eran previstas...

4ena partida : doman, la grand tremparà la bugada...

la_bugada

Arcaishon, enfin ! L’òme que davala de la miquelina de Bordèu escapa un riset aganit. Dempuèi qu’a daissat Ambrun, fa mai d'una setmana, a prés un trin aprèp l’autre gaireben sens dormir. Ten una brava caganha a fòrça de manjar pas que de racions de l’armada estat-unisenca, e comença de se pensar qu’auriá benlèu melhor fach d’anar veire los russes. Per acabar lo viatge, de Clarmont a Bordèu, es estat fòrçat de prenne una correspondéncia a la gara d'Austerlitz. Atal a poscut vérificar la règla d’aur que vòl que, d’un punt d’Occitània a un autre, lo camin mai cort passa per París. Aquò rai : lo futur malhum ferroviari occitan partirà de Severac-lo-Castel.

Se met en cerca de l’Ostalariá de la Platja, ont es estada reservada una cambra al nom de Felix Costesoulane. Tanlèu barrada la pòrta, se seita sul liech, tira la pichòta radió de la valisa, fa virar la manivèla e parla dins lo micró : 

- "Atencion atencion… Un messatge d’Occitània Liure. Doman, la grand tremparà la bugada dins la baia d’Arcaishon. O repetissi : doman, la grand tremparà la bugada dins la baia d’Arcaishon…"

Al meteis moment, al bèl mitan de l’Atlantic, l’amiral Mc Kenzy se ten sul pont de pòrta-avion USS Lincoln. Sos galons lusisson al solelh colcant, son agach blau se perdis dins l’estremal que flambeja. A l’entorn, la IVe flòta de l’US Navy vòga suavament. Espectacle dels remirables ! Tot es prèst per un desbarcament de tria. Mc Kenzy espera pas pus qu’una darrièra entresenha : quora ? E subretot : ont ?

- "Amiral, Amiral !" Mc Kenzy se vira e prend la fuelha que li porgis lo luoctenent. "Avèm recebut lo messatge, Amiral ! The grandmother will do the laundry tomorrow

- Doman ? Fòrça plan ! But where ?

- Dins la Baya de los Cochinos !"

Mespresa tarribla ! Era marrida la ligason radiò ? Aquò o sauprem pas jamai ! La cara del monde n’es cambiada. En plaça d’Occitània, l’USS Lincoln e tota la IVe flòta de l'US Navy se viran cap a Cubà…

Lo_calhon_que_nada

Cronologia del mes d’abrieu 1961 :

17 d’abrieu : desbarcament de la Baia dels Tessons.

19 d’abrieu : las tropas americanas son garçadas a la mar. L’operacion es una cagada. Fidel Castro cabussa dins lo camp sovetic.

20 d’abrieu : Sus la platja d’Arcaishon, Fontan n’a son pro d’esperar de bada. Tòrna a l’ostalariá.

21 d’abrieu : putch dels generals en Algièr.

23 d’abrieu : lo general De Gaulle condemna lo “quarteron de generals en retirada” e s'atribuís los plenhs poders.

24 d’abrieu : los generals sedicioses se rendan. Lo bèl Charles manda una lettra a Ivòna : « L’armada m’es demorada fisela. E tu ? »

25 d’abrieu : Ivòna s’entòrna a l’Elisèu .

26 d’abrieu : Fontan s’entòrna a la gara d’Arcaishon.

Tancat sus un banc de la gara, Francés Fontan espera lo trin de Bordèu. Es completament desesperat. Li cal faire lo viatge del retorn cap a las Valadas, e pasmens… Dins sa man, vira e revira la capsula de cianura. Es a mand de l’avalar quand entrevei una patrolha de gendarmas amb un bergièr allemand. Sens chifrar mai, Fontan monta dins lo primièr trin, lo de Baiona. La capsula demòra sul banc. Quand la patrolha passa, lo can l’engolís. Fin finala, serà l'unica victima del desbarcament mancat de la baia d’Arcaishon.

plage_argent___1_

Per legir l'integrala, clicatz aici : Lo_desbarcament_mancat_de_la_baia_d_Arcaishon