panoccitan.org

7 juillet 2010

Mandat a la Setmana lo 7 de julhet :

Dins la Setmana del 17 de junh, fasetz resson a l’article « Orrors lexicalas » de Josiana Ubaud, que visa subretot lo site panoccitan.org d’Arve Cassinhac. Dins l’edicion que seguís, Jacme Taupiac a plan rason de parlar de « patologia lingüistica » a prepaus d’aquel site. Pasmens es una patologia fòrça mai prigonda que non pas solament çò que Josiana Ubaud dís « lo concèpte de distanciacion maximala », es a dire l’obsession d’una distancia mai granda al francés. D’efièch, aquò’s donar a Cassinhac una logica alara que n’a pas ges, puèi que per exemple privilegia las terminasons en –iste (occitaniste, especialiste…). Non, verai, lo tipe es un caluc sens cap de rason, si que non la de tòrcer la lenga nòstra, una lenga que ten en òdi o puslèu qu’aima coma Frankenstein aimava la vida.

Un falord de mai, rai d’aquò ! Çò mai grèu es que, se picatz "dictionnaire français-occitan" sus Google setz segur d’acabar dessus. E cal dire que lo site es agradiu, plan fach, amb un diccionari aisit de manejar e un otís de conjugason fòrça complet. Aquí una situacion de las terriblas puèi que Cassinhac, en pegant lo mot "occitan" a son aisina, balha rason als acarnasits que penson que l’occitanisme es una entrepresa de nivèlament de la(s) lenga(s) d’òc, una operacion que la tòca es de destrusir los parlars autentics e de los remplaçar amb una lenga plastificada.

E per respondre, de qu’avèm ? L’indignacion legitima d’Ubaud e de Taupiac, òc, mas de diccionari en linha occitan-francés que faga legitimament concurréncia al de panoccitan.org : cap d’un. La fe sens òbra mòrta es !