17 août 2009
Lo conse e la Sijanòta (3)
[Resumit dels episòdis 1 et 2 : Lo novel conse vòl que la populacion conesca qu'es un crane desfensor del servici public. De qué far ? Fotre defòra los calandrons, de segur !]
L'afar es plegat. La lauseta,
Emai la trobetz manhagueta,
Te li van calmar lo bresilh
Amb un brave còp de fusilh.
Pasmens, çai o endacòm mai,
L'arbitrari caça jamai
Sens se cargar una masqueta
Qu'acapte sa missanta tèsta.
"Sabetz que la securitat
Es la mèuna prioritat,"
Çò ditz lo conse a la polalha
Que li servís de conselalha,
"Aqui dessùs, la Calandreta,
Per parlar clar, es gaire neta :
Dins lo local, i a de dangièrs
Qu'an mancats los quites pompièrs ;
Es quicòm que se pòt ni veire,
Ni explicar. Me devètz creire !
(Disi res del perilh moral
De parlar coma un animal)
Figuratz vos qu'un calandron
S'escaraunhe lo genolhon,
Los parents serián plan capables
De ne nos rendre responsables...
Nos anam pas daissar bicar :
Defòra los anam ficar !"
E lo conselh municipal
Benesís lo polit trabalh ;
Son d'elegits que sens dilèma,
Sens i veire ges de problèma,
Sens lagrimas e sens remòrs,
Votarián per lor pròpia mòrt.
De seguir...
07 août 2009
Lo conse e la Sijanòta (2)
[Contuniam amb lo nòstre fulheton de l'estiu. Resumit de l'episòdi 1 : un conse tot nòu arriba a l'ostal de comuna de Sijan...]
Lo novel conse s'es tancat
Dins son sèti, e a soscat.
"Manqui d'idèias, es pas un drama :
Ai ganhat sens cap de programa...
Mas o van veire a Sijan :
Soi un crane republican !
Una tactica vau metre al punt."
E sòna lo primièr adjunt
Lo primièr adjunt, a de bon,
Es pas la mitat d'un colhon.
"Roger ! çò ditz, la Calandreta,
Li anam copar la cambeta,
Car nòstra escòla comunala
Acara una risca fatala
Per en causa d'aquela clica
Que te li panan la practica.
Òm nos parla de tolerança...
Rai d'aquò ! Aquí sèm en França !
De plaça n'i a, en Republica,
Son que per l'escòla publica.
O sabèm, darrièr l'occitan,
S'amagan los del Vatican,
Los fons de pension de Florida
E mai la man de l'Atlantida.
Plega nos aquela pagalha
Que nos mena dins la muralha !
Faràs, pel servici public,
Un acte fòrt e simbolic.
Atal, per aqueles pebrons
Qu'enfantèron de calandrons,
I aurà pas mai d'escampa : tot
Lo monde, zo ! Dins lo mamot !"
De seguir...
02 août 2009
Lo conse e la Sijanòta (1)
[Començam ara un long (enfin, veirem ben) poèma del genre epic e de las rimas aproximativas. Cap de semblança es pas fortuita]
Dins la vilòta de Sijan,
En mai de zebres e d'elefants,
D'un estanh, d'un fum de molins
Que fan de sòus amb lo marin,
En mai d'una gendarmerie
E d'una còla de rugbí,
I a una escòla Calandreta,
Eroïna de l'istorieta.
Per fins que lo mainatge aprenga
La libertat emai la lenga,
Son de parents dins lo canton
Que lor escòla la vòlon
Associativa e laïca.
Pas de qué clavar la botica ?
Çò pensatz. Vos enganatz plan :
Ubu fa conse de Sijan
Las eleccions municipalas
A Sijan son jamai banalas.
Per veser passar la savonèta,
Lo public paga la bilheta.
En 2008, per la campanha,
Bravament calfèt la castanha :
De listas n'i aguèt a bodre,
L'elector aguèt de que mòldre.
Entre "L'avenir per Sijan",
"D'abòrd Sijan", "Sijan doman",
"Sijan per davant per darrièra"
E ne doblidi dins la tièra...
Caliá plan sortir un ganhant
E se'n tornar laurar lo camp.
Foguèt "Sijan a la ramassa"
...Voliái dire : "Sijan amassa"
De seguir...
