9 arguments contra la diversitat lingüistica

Lo site Eurominirity publiguèt un article qu'avalis un per un los arguments dels adversaris de la diversitat lingüistica. Coma siai un democrata afogat, lor vòli porgir un drech de responsa. Vaqui doncas consi la jacobinalha respondon als arguments dels aparaires de las lengas :

Argument n°1 : las lengas regionalas son de lengas vertadièras.
Aquò’s pas possible, perque las compreni pas.

Argument n°2 : las lengas regionalas an produsit de litératura de valor.
Fals ! N’ai pas jamai legit (de veire argument n° 1).

Argument n°3 : las lengas regionalas apartenan a l’istòria francèsa.
Es una messorga de las grandas. Vaqui l’istoria vertadièra : las lengas regionalas dintreron dins França amb los nazis en 1940, que los petainistas lors dubrigueron la pòrta. Abans, la França parlava pas que francès dempuèi los gallesses (de veire Jules Ferix e Bernard Henry Levix).

Argument n°4 : las lengas regionalas menaçan pas l’unitat nacionala.
Fals ! Fals ! Fals ! Los militants patesofòns son d’extremistas pagats per l’Union Europenca per terorisar a l’amagat nòstres inspectors de l’educacion nacionala. La toca finala : l’Europa de las regions, es a dire l’Europa etnica, es a dire l’Europa alemanda.

Argument n°5 : defendre las lengas regionalas es defendre la democracia.
Encara cal dire de non ! Lo francès es LA lenga democratica. S’aprenes lo francès, aprenes la democracia (qu’es un mòt francès). D’efiech, la Republica francèsa es lo pais mai democratic de la galaxia. La prova : 100 % dels francèses vòlon parlar pas que francès (son pas de francèses los autres).

Argument n°6 : l’ONU condamnèt França per aparar pas sas lengas regionalas.
N’avèm pas mestier d'aquel "machin", avèm lo Senat.

Argument n°7 : las lengas regionalas son a crebar. Se òm fa pas ren serà una riquesa lèu perduda.
Que marida fe ! Son pas una riquesa mas una despensa : còstan de sòus los peluts qu’ensenhan aquelas pseudo-lengas. Se dispareisson, podrem comprar un mièj Rafale de mai.

Argument n°8 : lo bilingüisme permet de se comprene melhor, doncas de comunicar melhor ambe los autres.
De que ? De que ?

Argument n°9 : la diversitat culturala es la modernitat.
Te nos caldria explicar perdeque auriam mestier de la modernitat. Sem franceses e França es eternala.